Xoves, Agosto 11

O Concello de Neda continúa con “Bravas”, de Isabel Risco, a programación do Día da Muller

Google+ Pinterest LinkedIn Tumblr +

No marco da programación do Día da Muller, o Concello de Neda programa este venres ás 20,30 h na Casa da Cultura a representación da obra teatral “Bravas” de Isabel Risco. Trátase dunha produción teatral sobre mulleres sen medo, mulleres que forman parte dun valeroso clan, o clan que elas mesmas paren, amamantan, manteñen, constrúen cós alicerces da rebeldía, da rebelión, da ilusión, do inconformismo, da valentía, da xustiza social, da empatía e da humanidade. As persoas interesadas en asistir xa poden reservar a súa entrada, ó prezo único de 2 euros, chamando ó teléfono 981 39 02 33.

III Premio Luísa Villalta da Deputación da Coruña, Isabel Risco protagoniza a peza, que constitúe o seu segundo espectáculo unipersoal, no que nos ofrece a súa particular visión da historia das mulleres galegas. Unha historia sempre roubada, agochada e invisibilizada.

Na obra, Isabel Risco proponnos un xogo desde o teatro cómico e comprometido. Alegre e combativa, porque entende que se non podemos bailar, se non é divertíndonos, tampouco é a nosa revolución. Así, con este espectáculo tamén pretende reivindicar o humor das mulleres, que ofrece unha perspectiva única, plural, diversa, poliédrica e tan necesaria da realidade.

Bravas fai un repaso histórico pola nosa era, desde a época castrexa ata o século XXIII. Unha viaxe no tempo con paradas en diversas estacións, reparando nas pequenas e grandes historias protagonizadas polas nosas mulleres. Isabel Risco ponse na pel dunha muller do rural galego de finais do século XXVII, dunha muller en loita en plena revolución industrial, dunha rapaza que descobre o mundo nos anos 60… Mulleres do noso pasado, do noso presente e, tamén, do noso futuro. E todo isto pasado polo filtro, sempre aloucado, sempre cómico, sempre sorprendente desta actriz sen igual.

Share.

Comments are closed.