O Concello de Neda convoca un proceso selectivo, mediante o sistema de concurso, para nomear, de forma urxente, a un funcionario ou funcionaria interinos para a praza de traballador social a tempo parcial. As persoas interesadas terán ata o 6 de abril para solicitar a participación e presentar a documentación.
A decisión adóptase ao quedar vacante a praza, tras a renuncia voluntaria da profesional que a ocupaba, e quedar esgotada a bolsa de traballo creada hai catro anos, ao contar actualmente con emprego todas as persoas que figuraban nela. A duración da interinidade será ata novembro deste ano.
Poden optar a este posto a media xornada persoas de nacionalidade española ou doutros estados da UE, que non chegaran a idade máxima de xubilación, e dispoñan do título de Grao universitario en Traballo Social, diplomado en traballo social ou titulación universitaria de grao equivalente. Deberán ter capacidade funcional para o desempeño das tarefas e non poderán estar incursas en causas de incompatibilidade nin ter sido separadas do servizo na administración pública mediante expediente disciplinario.
Dado que se trata do concurso, o tribunal valorará a experiencia profesional das persoas candidatas en postos similares tanto na administración como na empresa privada e tamén a formación específica que poidan acreditar en relación ao traballo a desempeñar.
Quen queira aspirar a ocupar o posto terá de prazo ata o luns 6 de abril para presentar a súa instancia, co modelo oficial dispoñible, e coa documentación complementaria no rexistro do Concello.
Descarga aquí o modelo oficial e as bases da convocatoria:
Anuncio aprobación das bases e convocatoria
Certificado da aprobación das bases do concurso
Publicación das bases e da convocatoria no BOP
Anuncio apertura prazo de presentación de solicitudes
