Neda adheriuse á Declaración institucional polo Día mundial das enfermidades raras, impulsada pola Federación Española de Enfermedades Raras. Unha iniciativa que pon o foco na realidade angustiosa de máis de tres millóns de persoas que conviven en España con patoloxías pouco frecuentes ou sen diagnóstico. Doenzas que, na súa maioría, son xenéticas e conxénitas e que, en moitos casos, resultan incapacitantes e conlevan risco vital.
O Concello de Neda fai súa as reivindicacións do colectivo, demandando que as institucións competentes impulsen medidas dirixidas a promover a investigación, o diagnóstico precoz e o tratamento, tanto farmacolóxico como mediante outros tipos de terapias, en tempo e en condicións de equidade, das enfermidades raras. Na actualidade, só o 6% das 6.417 identificadas en Europa teñen tratamento.
