O Concello de Neda poñía en marcha este luns o campamento de verán Neda concilia. Trátase dunha iniciativa gratuíta, destinada a facilitar durante o mes de xullo a conciliación a ás familias do municipio. Un total de 84 nenas e nenos empadroados na localidade- 75 familias- beneficiaranse desta proposta de lecer estival.
Só unha semana despois de finalizar as clases, as instalacións do CEIP San Isidro volvían encherse de vida, grazas ao arranque do campamento municipal. De luns a venres, agás o festivo 25 de xullo, haberá unha morea de actividades para todos os gustos, entre as 8.45 e as 13.45 horas.
O alcalde, Ángel Alvariño, e a concelleira de Igualdade, Ángeles Puentes, achegábanse esta mañá ao centro escolar para dar a benvida aos participantes: nedenses de entre 3 e 12 anos, divididos en tres grupos, en función da idade.
Tal e como se explicou ás familias a pasada semana, o proxecto incluirá a diario actividades predeportivas, actividades creativas, talleres medioambientais, propostas de promoción da igualdade, de alimentación saudable… e como sucedía en anos anteriores, un día a semana, a rapazada desfrutará ademais de xogos de auga na piscina municipal.
Dende o Concello de Neda incídese na importancia deste servizo gratuíto, financiado con fondos municipais, e destinado a facilitar neste primeiro mes das vacacións escolares, que as nais e pais de menores empadroados na vila poidan conciliar vida familiar e laboral, sen ter que sobrecargar aos avós e avoas. A aposta busca ademais evitar o sedentarismo dos máis novos durante o período non lectivo, fomentando o lecer activo.
