Aberto o prazo de inscrición para a “VI Carreira escolar do Concello de Neda”

Google+ Pinterest LinkedIn Tumblr +

O domingo 18 de xuño terá lugar a sexta edición da Carreira escolar Concello de Neda. O servizo municipal de Deportes, que promove esta iniciativa destinada impulsar a práctica de atletismo e fomentar a convivencia entre o alumnado local, abre o prazo de inscrición tanto para os centros educativos nedenses como para aqueles outros de fóra, con nenos interesados en participar.

A proba disputarase a partir das 11 horas na contorna natural da pista polideportiva de Subarreiros (inmediacións da ribeira de San Nicolás). E a idade dos deportistas –menores de entre 4 e 12 anos- determinará a adscrición a unha das catro categorías existentes e tamén a distancia que deberán percorrer.

Así, os pequenos e pequenas da categoría biberón (nacidos no 2018 ou no 2019) correrán 50 metros aproximadamente; os pre-benxamíns (nados no 2016 e no 2017), 300 metros; os benxamíns (con data de nacemento no 2014 ou 2015) un total de 600 e, finalmente, os alevíns (de 2011, 2012 ou 2013) correrán 900 metros.

Os colexios nedenses deberán facer a inscrición como equipo, tendo que enviar a relación de integrantes antes do 15 de xuño, ao correo electrónico escolasneda@gmail.com. A través dese mesmo email e dentro do mesmo prazo poderán inscribirse tamén centros doutras localidades nos que cursen estudos rapaces interesados en sumarse á proba deportiva. Neste caso, terán que indicar nome e apelidos, DNI, idade, e nome centro ao que pertencen.

Apuntan dende a organización que se establece un tope máximo de 50 participantes por cada categoría masculina e feminina, e detallan que a entrega de dorsais terá lugar o día da carreira, entre as 10 e as 10.45 horas. Todos os corredores/as, independentemente da posición na que finalicen, recibirán a súa medalla conmemorativa.

Share.

Comments are closed.